Eksamen del 2: FoU-oppgåve (PPU3220, PPU3520D, PROF4045)
FoU-oppgåva er ein individuell eksamen som integrerer pedagogikk og fagdidaktikk B med erfaringar frå praksis. Gjennom arbeidet med oppgåva skal du utvikle ein viktig kompetanse for ein profesjonell og lærande lærar, nemleg å kunne utforske, vurdere kritisk og vidareutvikle eigen lærarpraksis.
Lærarprofesjonen er svært mangfaldig, og i FoU-oppgåva skal du ta for deg éi side av di eiga profesjonsutøving i fag B. Det du vel å undersøkje, må vere knytt til eitt eller fleire av punkta i det læringsutbytet som er skildra i emnebeskrivinga, og det må ha tydeleg relevans for ditt fagdidaktiske fag B.
I undersøkinga skal du bruke éin av desse metodane, eventuelt to i kombinasjon, om det er mest tenleg:
- Intervju med eit utval elevar
- Skriftlege innspel frå elevar (logg, spørjeskjema o.l.)
- Observasjon (du observerer elevar eller du blir sjølv observert av medstudent, rettleiar eller andre)
- Analyse av elevarbeid (tekstar, prøvesvar, munnlege presentasjonar, digitale produkt o.l.)
All informasjon frå praksis skal anonymiserast slik at det ikkje er mogleg å identifisere skule, lærarar, elevar og medstudentar. Det er ikkje høve til å hente inn video-, bilete- eller lyddata i samband med FoU-oppgåva, og undersøkinga di kan ikkje offentleggjerast eller brukast i andre samanhengar enn eksamenssvaret.
Formelle krav
Eksamenssvaret skal ha eit omfang på 3000–4000 ord (ikkje medrekna framside, litteraturliste og vedlegg). Bruk APA-norma for referansar og litteraturliste.
Eksamenssvaret skal ha følgjande innhald (men ikkje nødvendigvis som eigne avsnitt eller i denne rekkefølgja):
- Framside med kandidatnummer, emnekode og emnenamn, aktuelt semester og talet på ord i oppgåva
- Innleiing med presentasjon av temaet for oppgåva og av problemstillinga
- Utgreiing om pedagogisk og fagdidaktisk pensumlitteratur som er relevant for problemstillinga
- Ein metodedel som grunngjev val av metode og gjer greie for korleis undersøkinga er gjennomført
- Resultat
- Drøfting av problemstillinga og kva slags implikasjonar undersøkinga har for vidareutviklinga av eiga profesjonsutøving
- Litteraturliste
- Eventuelle vedlegg: Innsamlingsverktøy som er brukt i undersøkinga (observasjonsskjema, spørjeskjema, intervjuguide o.l.), skal leggast ved. Innsamla materiale (elevtekstar, utfylte spørjeskjema o.l.) skal ikkje leggast ved.
Eittfagsstudentar på lektorprogrammet (PROF4045) skal også leggje ved liste over sjølvvald tilleggslitteratur. Tilleggslitteraturen må vere godkjend av faglæraren.
Eittfagsstudentar på PPU deltid (PPU3520D) og PPU heiltid (PPU3220) skal bruke ordinært pensum i sitt fag.
Eksamensinnlevering
Eksamenssvaret skal leverast i eksamensløysinga Inspera. Sjå informasjon om eksamen i Inspera på semestersida. Merk at svaret skal leverast som eitt dokument, sidan det ikkje er mogleg å laste opp vedlegg til eksamenssvaret i Inspera. Sjå innleveringsfrist for FoU-oppgåva under «Eksamen: tid og sted» på semestersida.
Vurderingskriterium
Vurderingskriteria gir ei typebeskriving av svar på dei ulike nivåa. Eksamenssvar vil i praksis ofte ha innslag av ulike nivå, og vurderinga vil måtta vere basert på ei ganske stor grad av skjøn. Til dømes vil ein total mangel på fagkunnskap i pedagogikk og/eller fagdidaktikk gi karakteren «F - ikkje greidd», sjølv om kandidaten dokumenterer ei betydeleg refleksjons- og formidlingsevne.
Karakter/
UiO-beskriving
|
Problemstilling og metode
|
Vurderingsevne og sjølvstende
|
Språk, struktur og formalia
|
|
A Framifrå
- Framifrå prestasjon som klart utmerker seg.
- Kandidaten syner svært god vurderingsevne og stor grad av sjølvstende.
|
- Problemstillinga er klar, avgrensa og svært relevant for det læringsutbytet som er ført opp i emnebeskrivinga, og for det fagdidaktiske faget.
- Metoden/metodane som er valt, er veleigna til å kaste lys over problemstillinga, og den metodiske gjennomføringa er svært tydeleg beskriven og konkretisert.
- Resultata frå undersøkinga er svært tydeleg framstilte og veleigna til å kaste lys over problemstillinga.
|
- Kandidaten argumenterer svært klart og sjølvstendig.
- Tilfanget av pedagogisk og fagdidaktisk teori er svært relevant for problemstillinga, og kandidaten syner ein framifrå kjennskap til og forståing av pensumlitteraturen.
- Kandidaten evnar på ein svært god måte å sjå samanhengar mellom pedagogikk og fagdidaktikk og har ein nyansert og kritisk diskusjon av teori og resultat.
|
- Språket er svært presist og sjølvstendig.
- Teksten er godt strukturert.
- Krav til innhald og formalia er oppfylte.
|
|
B Mykje god
- Mykje god prestasjon.
- Kandidaten syner mykje god vurderingsevne og sjølvstende.
|
- Problemstillinga er klar, avgrensa og svært relevant for det læringsutbytet som er ført opp i emnebeskrivinga, og for det fagdidaktiske faget.
- Metoden/metodane som er valt, er veleigna til å kaste lys over problemstillinga, og den metodiske gjennomføringa er mykje tydeleg beskriven og konkretisert.
|
- Kandidaten argumenterer klart og sjølvstendig.
- Tilfanget av pedagogisk og fagdidaktisk teori er mykje relevant for problemstillinga, og kandidaten viser mykje god kjennskap til og forståing av pensumlitteraturen.
- Kandidaten evnar på ein mykje god måte å sjå samanhengar mellom pedagogikk og fagdidaktikk og har ein nyansert og kritisk diskusjon av teori og resultat.
|
- Språket er presist og sjølvstendig.
- Teksten er godt strukturert.
- Krav til innhald og formalia er oppfylte.
|
|
C God
- Jamt god prestasjon som er tilfredsstillande på dei fleste område.
- Kandidaten syner god vurderingsevne og sjølvstende på dei viktigaste områda.
|
- Problemstillinga er relevant for det læringsutbytet som er ført opp i emnebeskrivinga, og for det fagdidaktiske faget.
- Metoden/metodane som er valt, er eigna til å kaste lys over problemstillinga, og den metodiske gjennomføringa er tydeleg beskriven og konkretisert.
|
- Kandidaten argumenterer til dels sjølvstendig.
- Tilfanget av pedagogisk og fagdidaktisk teori er relevant for problemstillinga, og kjennskapen til og forståinga av pensumlitteraturen er prega av breidd og djupn utan klare manglar.
- Kandidaten evnar å sjå samanhengar mellom pedagogikk og fagdidaktikk og diskuterer teori og resultat med noko nyansering og kritisk refleksjon.
|
- Språket er godt og sjølvstendig.
- Teksten er strukturert.
- Krav til innhald og formalia er oppfylte.
|
|
D Nokså god
- Ein akseptabel prestasjon med nokre manglar.
- Kandidaten syner ein viss grad av vurderingsevne og sjølvstende.
|
- Problemstillinga er relevant for det læringsutbytet som er ført opp i emnebeskrivinga, og for det fagdidaktiske faget.
- Metoden/metodane som er valt, er til ein viss grad eigna til å kaste lys over problemstillinga, og den metodiske gjennomføringa er til ein viss grad beskriven og konkretisert.
|
- Oppgåvesvaret er prega av argument som kan verke som meiningsytringar.
- Tilfanget av pedagogisk og fagdidaktisk teori har noko relevans for problemstillinga, men kjennskapen til og forståinga av pensumlitteraturen er noko mangelfull.
- Kandidaten evnar berre i nokon grad å sjå samanhengar mellom pedagogikk og fagdidaktikk.
- Teori og resultat vert presenterte og diskuterte på ein lite nyansert og kritisk måte.
|
- Språket er nokså godt, men lite sjølvstendig og prega av mangel på faguttrykk.
- Teksten har ein viss struktur.
- Krav til innhald og formalia er i rimeleg grad oppfylte.
|
|
E Tilstrekkeleg
- Prestasjonen tilfredsstiller minimumskrava, men heller ikkje meir.
- Kandidaten syner lita vurderingsevne og sjølvstende.
|
- Problemstillinga er noko relevant for det læringsutbytet som er ført opp i emnebeskrivinga, og for det fagdidaktiske faget.
- Metoden/metodane som er valt, er til ein viss grad eigna til å kaste lys over problemstillinga, og den metodiske gjennomføringa er til ein viss grad beskriven og konkretisert.
|
- Oppgåvesvaret er prega av usamanhengande argument som i stor grad framstår som meiningsytringar.
- Tilfanget av pedagogisk og fagdidaktisk teori har noko relevans for problemstillinga, men kjennskapen til og forståinga av pensumlitteraturen er mangelfull.
- Kandidaten evnar berre i liten grad å sjå samanhengar mellom pedagogikk og fagdidaktikk.
- Teori og resultat vert presenterte og diskuterte på ein lite nyansert og kritisk måte.
|
- Framstillinga er forståeleg, men språket er til dels uklart og/eller forvirrande.
- Mangel på faguttrykk er påtakeleg.
- Teksten har svak struktur.
- Krav til innhald og formalia er i nokon grad oppfylte.
|
|
F Ikkje greidd
- Prestasjon som ikkje tilfredsstiller dei faglege minimums-krava.
- Kandidaten syner både manglande vurderingsevne og manglande sjølvstende.
|
- Problemstillinga har liten eller ingen relevans for det læringsutbytet som er ført opp i emnebeskrivinga, og for det fagdidaktiske faget.
- Metoden/metodane som er valt, er i liten grad eigna til å kaste lys over problemstillinga, og den metodiske gjennomføringa er i liten eller ingen grad beskriven eller konkretisert.
|
- Oppgåvesvaret er prega av usamanhengande argument som framstår som meiningsytringar.
- Tilfanget av pedagogisk og fagdidaktisk teori har liten relevans for problemstillinga, og kjennskapen til og forståinga av pensumlitteraturen er svært mangelfull.
- Kandidaten ser i liten eller ingen grad samanhengar mellom pedagogikk og fagdidaktikk.
- Teori og resultat blir i liten eller ingen grad diskuterte.
|
- Framstillinga er forståeleg, men språket er uklart og/eller forvirrande.
- Mangel på faguttrykk er påtakeleg.
- Teksten er ustrukturert.
- Krav til innhald og formalia er i liten eller ingen grad oppfylte.
|